Электронлă вулавăш

Ку сайтра эсир чăвашла çырнă хайлавсене тупма пултаратăр. Пур хайлава та авторĕ, çырнă çул тăрăх çăмăллăн тупма пулать. Ку архива ятарласа хатĕрленĕ — сире килĕшекен хайлавсене эсир ку сайтра та, уйрăммăн уçласа илсе те вулама пултаратăр.

Пӗлме: хайлавсем вырнаҫтармалли йӗрке.

Хĕвел анать. Карри хура сĕм каçăн,

Тӳпе тулли çап-çутă çăлтăрсем.

Хăш çăлтăрĕ сан килӳ-ши, аннеçĕм,

Ăçтан яран мана эс саламсем.

Пĕлетĕп: эс савса мана пăхатăн,

Чи йывăр чух паратăн вăй-хăват.

Мана валли ыр сăмахсем тупатăн,

Упрантăр тетĕн таврара ыр ят.

Аннеçĕм, эсĕ асăмрах пурнатăн,

Ман юррăмра яту та сан сăну.

Эс пурăнма та ĕçлеме паратăн

Кашни кунах çĕн вăй-хавхалану.

Сан çăлтăру, аннеçĕм, ялан çиçĕ

Мана сĕм тĕттĕмре те çутатса.

Çак юррăм ман, инçе пулсан та, çитĕ,

Аннеçĕм, сан патна çунат хушса.

24.11.06.

Пирĕн ялта чи малтан,

Паллах, пулнă Малтикас.

Кайран вара — Хăрахкас.

Хăрахкас пулсан пĕр кас

Вара шăтнă Çĕнĕкас.

Унтан ӳснĕ Çӳлтикас.

Ял хĕрринче — Тимĕрçлаç,

Вăл туптанă Тимĕрçкас.

Ăçтан тухнă Тислĕккас

Каламасăрах юлас.

Иртнине ан шелле —

Вăл сана хĕрхенмерĕ.

Кĕтнĕ чух эс хĕлле

Кĕркунне час пĕтмерĕ.

Эсĕ çутă ыйтсан

Тĕксĕм кун хуçаланчĕ.

Ĕмĕтсем çухалсан

Яш чуну тăвăрланчĕ.

Ĕнерхи кун йĕрне

Асăнмалăх упратăн,

Ас илсе иртнине

Пĕрмаях кулянатăн.

Ирĕк пар чĕрӳне!

Эс ăна пĕтеретĕн.

Паянхи телейне

Хăв сисмесĕр вĕçертĕн...

Çеçпĕл тесен...

Çӳлти ката¹ тӳпемĕнчен

Тем анлăш уçăлать инçет.

Пăхса тăратăн нумайччен

Виç йӳплĕ каврăç айĕнчен.

Кăнтăр енче Канаш тăпри

Улăп чукмарĕ пек ларать.

Паян çанталăк тăрă пит,

Вăл çеç шур сĕрĕм кăларать.

Унтах Ухман та Шăхасан,

Унтах Атлаш та Энтрияль.

Яш-кĕрĕм чух тахçан-тахçан

Пăрле тухаттăмăр вăййа.

Шĕкĕр вăрманĕ хĕрринче

Касаккассин кĕске урамĕ.

Унта Куçма Мишши çуралнă

Пăлхавлă ĕмĕр çитиччен.

Ик класлă вулăс шкулĕнче

Çеçпĕл хĕлхемĕ çулăмланнă.

Хресченĕн терт-нуши çинчен

Вăл уççăн çырнă, сăвăланă.

Кавал енчен Чикме таран

Чăваш чĕлхи чĕрĕлессе

Поэт ĕненнĕ ачаран,

Пуç хунă уншăн кĕрешсе.

Шăхасанта та Çеçпĕлте,

Шупашкарта та Теччĕре.

Çеçпĕл çуралнă эрнере

Культура форумĕ кĕрлет.

Çĕн сăвăçсем, çĕн юрăçсем

Поэзи уявне килеççĕ.

Малалла

Хĕвел тухнă кăна-ха. Çан-çурăма уçăлтарса çӳçентерекен сывлăш пур-çук ыйха тӳрех уçса ярать. Сывлăм пуснă курăк çийĕпе Мишша колхоз ферминчен Памир ăйăра çавăтса килет. Тап-тап-тап-тап, —таплаттарса, вĕсем, улăхран анса кил умне çитрĕç, Мишша Памира ридван турти хушшине тăратрĕ те кӳлме пуçларĕ. Лавçă хăмăтне илсе, урипе тапса чĕнне хытă çыхрĕ, ăйăр мăйĕ урлă пĕкĕ ывăтса, туртисене йăлмакларĕ, унтан чăлпĕр çумне ик енчен тилхепе çекĕлĕсене çаклатрĕ те лаша çурăмĕ урлă ывăтрĕ.

Памир таканлă урисемпе кукалеме пуçларĕ. Ку ĕнтĕ «Ăçта эсир паян пурте?» тенине пĕлтерчĕ. Касри хĕрсем пĕрин хыççăн тепри чупса çитрĕç. Сенĕкĕсене ридван кĕтессине ывăтрĕç те шур тутăрĕсене мăй урлах çавăрса çыхма пикенчĕç, каллĕ-маллĕ чупкаласа, кĕпе аркисене вăркăштарчĕç. Памирĕ те Памир та, Мишши вара,.. картинка çинчи улăп тейĕн. Хĕрсем ун куçĕнчен çеç пăхса тăраççĕ.

— Кайрăмăр! — терĕ Мишша, ридван çине сиксе хăпарчĕ. — Паян Чĕнтĕрек хирĕнче улăм пуçтаратпăр. Улăм урине вара анкарти çывăхне тумалла.

Хĕрсем ридван хĕррине çерçисем пек ларса тухрĕç. Памир янравлăн кĕçенсе ячĕ. Ун сассине илтсе, ытти касра пуçтарăннă лавсем те хускалчĕç. Утсем тулхăрса сас пачĕç.

Малалла

Тăвана сума сăватпăр,

Мĕн ыйтсассăн та паратпăр,

Пулăшатпăр пĕр-пĕрне

Чухăн пурăннă чухне.

Ăмсанатпăр, хапсăнатпăр,

Харкашатпăр, хăмсаратпăр,

Айăплатпăр пĕр-пĕрне

Пурлăх уйăрнă чухне.

Пĕр-пĕрне инкек сунатпăр,

Мулсăр тăк — пуçна усса тăр.

Пуянсем хăйсем телейсĕр,

Пуянсен тĕнче илемсĕр.

Кĕл тăваççĕ, ӳкĕнеççĕ,

Çăлăнăç çӳлтен кĕтеççĕ,

Каçараççĕ пĕр-пĕрне...

Çăвана каяс чухне.

Ваçлей Кервене

Тĕнче саккунне кам хăйса хиреçлейĕ? —

Тăп çыхнă кĕлте те юлать пушанса.

Кунсем хутшăнса пынăçемĕн, Ваçлейĕм,

Пирте çухату та пырать хушăнса.

Паян эсĕ ак 60 çул илсе хутăн

Пĕр вĕçĕмсĕр Вăхăт хура хĕррине.

Юрать-ха упрать Упамса мезолитăн².

Мерчен пичетне — сар упа саррине.

Хура вăрманти шурă тутăрлă çĕмĕрт

Тата инçерех пек йĕпхӳ çунă май.

Элле сĕврĕлет пирĕн хĕрĕнкĕ ĕмĕт? —

Çут тунсăх хуллен сăрхăнать чунăма.

Кам курнă тĕм-тăм ларакан йăрăс шĕшкĕ

Шăпах çур çĕрте чечеке ларнине³?

Телей темелле-ши — кăштах астивмешкĕн

Тӳр килнĕ пире те Пегас парнине.

Эп çыртăм çынсем асăнмалăх трагеди,

Эс çыртăн «çынсем» — сăвăлла пĕр роман.

Апла ахаль мар сăвăçсенĕн ĕречĕ

Пире айккине уйăрса хăварман.

Айташ, Теветкел, Лукинпа Афанасьев...

Вĕсем маларах кĕнĕ çав туртана.

Пулни-иртнисем майĕпен манăçаççĕ,

Тен, ĕçнĕ те пуль вĕсемпе пĕр танах.

Малалла

Воспитатель — çĕр професси хушшинче

Уйрăлсах тăмасть ыттисенчен.

Анчах маншăн темшĕн çав-çавах

Пуринчен çак ĕç хаваслăрах.

Мана шанса панă ачасем

Чи пĕчĕккисем, сатуррисем.

Выляма-кулма ăста вĕсем,

Юрă-ташăра та малтисем.

Чĕрӳнте вут-çулăм алхассан

Ан кăтарт çавна ачасене.

Хуçăлса йĕрес килет пулсан та

Савăккăн кулма сан пĕлмелле.

Ăс парса каланă сăмахсем

Маншăн пулчĕç чи хаклийĕсем.

Юратсассăн çеç ачасене

Эсĕ курăн ĕçĕн илемне.

Юратсассăн пурнăç илемлĕ,

Юратсассăн пурте хитререх.

Юратсассăн эсĕ те килпетлĕ,

Юртсассăн эп телейлĕрех.

Çыран хĕр касси çеçке çурсассăн,

Пыл шăрши илем вăйне куçсан

Сан ятна эп асăнăп пĕр сассăр

Тĕлĕкре, самантлăха курсан.

Куллуна телей пĕрчи пек илĕп

Чĕрене çутмашкăн хăш чухне.

Сан сассу–ши ку тесе эп итлĕп

Пăла шывĕ пĕр чӳхеннине.

Пахчана та шăпчăкĕ иленĕ

Çуркунне çитсессĕн таврана.

Çухатни çунатланса килеймĕ,

Ĕмĕт çеç пултарĕ таврăнма.

Эх, мĕн-ма иртетĕн-ши яш вăхăт?

Шухăшăм чипер пикепелех.

Çамрăклăх çĕмрен пек вĕçрĕ хăвăрт.

Çамрăклăх хитреччĕ пурпĕрех.

.