Шăпчăк юрлать, янратать...

Василий Мач | Сăвă | 1914 | революциччен çырнисем | 537


Шăпчăк юрлать, янратать,

Чунăм илтет — хурланать.

Çак шăпчăкăн юррине

Тытса пули чĕрере?

Шăпчăк мана систерет

Савнă сар хĕр шухăшне.

Сар хĕр юрлать асăнса

Хăйĕн чунĕ савнине.

Чунăм савни — сар каччă,

Кил иксĕмĕр калаçар!

Калаçнă чух пĕр-пĕрне

Ыталаса чуптăвар.

Чунăм çунать, — савни, кил!

Пуçри хуйха хăвалар.

Ыталанса юрласа,

Манăн чуна пусарар.

Савни, сана сарă хĕр

Илĕртесрен мана шан.

Сана манран илеймĕç,

Ĕмĕрлĕхе пулăн ман.

Савни, пире никам та

Пĕр-пĕринчен уйăраймĕ.

Хаяр усал тăшман та

Пирĕн хушша кĕреймĕ.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: