Электронлă вулавăш

Чунăма пусарма çын шырарăм,

тупаймарăм эп ун йышшине.

Ах, мĕн пулчĕ сана, тăван ялăм,

эс çухатнă-çке çын ăшшине?

Анне пурччĕ ялта, атте пурччĕ.

Кĕтерех çӳресе пахчара,

иккĕн тан пире хирĕç тухатчĕç

килнине курсанах хуларан.

Халь те пур-ха ялта, пур тăванăм,

Сивлемест-ха пире, юп курать.

Пур пĕрех ăш вăркать питĕ манăн,

шăмшак мар, чун-чĕре ман сурать.

Тусăмсемччĕ, туссем, — ял илемĕ.

Калаçмашкăн шырап халь сире.

Илтĕнмеç сассăрсем, кĕвĕ-çемĕ,

Курăнмасть ыр сунан тус пире.

Халь çеç пурччĕ пĕр çын — калаçмалăх.

Чараймасăр чĕри çуннине

ĕçсе лартнă та путнă яланлăх —

юхса кайнă шывпа çуркунне...