Чечек çураççĕ чиесем...

Георгий Ефимов | Сăвă | 1997 | 519


Чечек çураççĕ чиесем,

Кӳкен те шап-шурах ларать.

Çĕн уйăх — тӳпери илем —

Тĕтре ăшне путать.

 

Шап-шур сеске пуç тăррине

Ӳкет те шуратать.

Çур каçĕ, тен, кĕркуннене

Асра тытма хушать.

 

Анчах та шурă çеçкене

Çил вĕçтерсе ярать.

Мĕн тăвăн! — Çӳçĕн кĕмĕлне

Кун-çул сыхлать, упрать.

 

Этемĕн те хăйне виçе —

Чечек çурать... кун-çул тăвать...

Малтан вăл ĕмĕтпе вĕçет,

Пуласлăхне курса çиçет, —

Кайран... туяланать.

 

Чечек çураççĕ чиесем.

Юлать-и улмуççи!

«Çĕре ялан илем кĕртсем», —

Пăшăлтатать ăш çил.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: