Сарă хĕвел тухрĕ ав тӳпене...

Сарă хĕвел тухрĕ ав тӳпене

Пурнăçăм манăн пĕр тикĕс килмерĕ,

Куртăм пурне те эп хам ĕмĕрте.

Шанчăкăм манăн çавах та сӳнмерĕ,

Тухĕ-ха терĕм хĕвел ман тĕлте.

Утрăм та утрăм, пĕр канăç пĕлмерĕм,

Шав такăрлатрăм эп пурнăç çулне.

Мĕншĕн эс, Пӳлĕхçĕм, кăмăл тумарăн

Ырă сунса ăраскал пиллеме?

Ĕмĕрĕн çулĕ пĕртте такăр мар-мĕн,

Çутă телей кӳреймест кашнине.

Пурпĕр шанатăп: çанталăк çуталĕ,

Сарă хĕвел тухрĕ ав тӳпене.

Çĕнĕ комментари хуш