Ирхине, шурăмпуç çĕкленсессĕн

Максим Ястран | Сăвă | 1941 | вăрçă | 592


Ирхине, шурăмпуç çĕкленсессĕн,

Хĕрлĕ хĕм хĕретсен тухăçа,

Тăшмана аркатса çĕмĕрмешкĕн

Эшелон тухса кайрĕ вăрçа.

 

Эшелон тухса кайрĕ... А эсĕ

Тутăрна сĕлтсе юлтăн пĕччен.

Сан шур тутăр питех çӳçентерчĕ

Ман чуна çеçен хир тӳпинче.

 

Курăнми пултăн эс. Эпĕ кайрăм,

Сан сăнна асăмра упраса.

Сан çинчен çыртăм эп сăвă-юрă,

Сăмаха ахах пек суйласа.

 

Чи паха парнерен те-çке хаклă

Шурăмпуç пек сан янкăр куллу.

Иксĕлмест асăмра сан кăварлă,

Çут хĕвел пек таса кăмăлу.

 

Ан кулян, вăрçă хирĕнче эпĕр

Тамалтарăпăр вутлă çиле;

Тăшмана тĕп туса час килетпĕр,

Эшелон килсе çитĕ киле.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: