Хуртлă улмасем ӳкеççĕ ир...

Энтип Ваççи | Сăвă | улма | 517


Хуртлă улмасем ӳкеççĕ ир,

Туттисем ӳкмеççĕ кĕр çитмесĕр.

Ан çĕкле ытла васкавлăн, мелсĕр...

Çĕрнине, — çум курăкне ан сир.

Хăй ура умне кусса пыни

Хаклă мар — çӳлти нимрен чĕнӳллĕ.

Тӳсĕмлĕх çитсен, кĕр кунĕ тӳлĕ

Ырлăхпа — вăл пулĕ чăн-чăнни.

...Сăввăмра пиçет тӳпе улми:

Кăнтăрла — хĕвел,

каç-каç вăл — çăлтăр.

Сар кĕрччен ăна ан татăр — чăтăр:

Пиçменни пулаймĕ шăл çемми...

Тутлă сĕтекпе тулса çитсе

Шал енчен тӳлеккĕн çуталсассăн —

Тат ăна, этем: вăл пиçнĕ саншăн —

Хăналан, «мухтав çĕре!» тесе.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ:

Шухăшсем