Эп куратăп

Сăвар Эртиван | Сăвă | 1971 | 550


Аннеçĕм калать,

Хĕвел вут çăмха парнелет, тет.

Çав чăмăр ӳссе çитĕнет те

Этем çуралать.

 

Те чăн, те суя – хирĕçместĕп,

Кĕместĕп чĕрре.

Камсен-ши, шутлатăн пуль эс те,

Хĕвеллĕ чĕре?

 

Чăлахчĕ пиччем,

Ури вăрçăра юлнă тетчĕ.

Сыпсан кăшт ташша хăй сĕветчĕ,

Пулмастчĕ кичем.

 

Калатчĕ вăл, эпĕ вилсен те,

Ман сӳнмĕ чĕре.

Те чăн, те суя вăл – пĕлместĕп,

Кĕместĕп чĕрре.

 

Çынна чĕресем çутатаççĕ,

Ăшăтаççĕ çĕре.

Савса чĕресем вутланаççĕ,

Çунаççĕ ĕçре.

 

Чăна суяран уйăратăп,

Кĕретĕп чĕрре,

Кашни ыр çынрах эп куратăп

Хĕвеллĕ чĕре.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: