Электронлă вулавăш

Хĕрарăмсем

пире çуратнă самантра

мĕн-мĕн çинчен

шутлаççĕ-ши сисмен хутран?

Пĕр шухăшне

пĕлме пулать пĕр йăнăшми:

Ан пултăр, теççĕ, варçăра

çĕр йынăшни.

Хĕрарăмсем

пире ăсатнă кунсенче

мĕн-мĕн çинчен

шутлаççĕ-ши перрон çинче?

Пĕр шухăшне курма пулать

куçĕсенче:

лăпках пулинччĕ ĕмĕрех

ку çĕр çинче.

Эпир ӳсетпĕр те

каятпăр салтака.

Пĕр мăшăр атă.

Телее — мăшăр такан.

Чĕн пиçиххи — кĕлте çыххи —

шинельсене

шăп пилĕкрен туртса çыхать

пĕр кĕлтене.

Е çурăмпа,

е хырăмпа,

е урапа...

Е улăхпа,

е пуш хирпе,

е урампа...

Салтак шăвать.

Салтак выртать.

Салтак утать...

Пит йывăр чух

пĕрремĕш хут табак туртать.

Хĕрарăмсем!

Эсир пилленĕ-çке пире

шинельсемпе

хӳтĕлеме Ĕçе, Мире.

Хĕрарăмсем салтаксемпе пĕрле

кашни:

— Ан пултăр, — теççĕ, —

вăрçăра çын йынăшни.