Мĕн-ма-ха...

Мĕн-ма-ха вилĕмрен эпир хăратпăр?

Сехре хăпать-çке тамăк куриччен...

Кама мĕн пӳрнĕ, çавăнта пулатпăр,

Пурнасчĕ шикленмесĕрех унччен.

Мĕн-ма-ха тăшманран пĕрмай таратпăр?

Тен, пирĕнтен вăл теветкеллĕрех

Кăштах хăмсарчĕ — чĕтреме пуçлатпăр,

Пуçа пĕксе çӳретпĕр ĕмĕрех.

Мĕн-ма-ха чăнлăхран та пăрăнатпар?

Вăлах сиплет, тен, юнлă сурана.

Эпир çапах та пĕр-пĕрне суятпăр,

Шап-шурă тетпĕр... хурана.

Мĕн-ма-ха

Ыйтăва хуравлаймастпăр...

Тен, аттесем пилленĕ хăрама?

Сехре хăпартнăн урăх пурăнмастпăр, —

Ан кайтăрччĕ яш ĕмĕр харама!

Çĕнĕ комментари хуш