Ашшĕн сăнӳкерчĕкĕ умĕнче

— Ах, аттеçĕм, эсĕ халь ăçта-ши?

Ах, аннеçĕм, ма салхуллă эс?

Сăнӳкерчĕкрен тинкерчĕ ашшĕ

Ывăлне, хăй нимĕн те чĕнмест.

— Вăрçăра эс пĕтнĕ-ши — пĕлместĕп,

Тен, Чернобыль çăтнă пурнăçна?

Мĕншĕн-ха, аттеçĕм, эс чĕнместĕн,

Ывăлна памастăн хуравна?

Ас илетĕп, чĕререх тăратăн,

Ыталатăн вăйлă аллупа...

Ах, мĕн-ма çапла тăлăх-туратăн

Çитĕнтертĕн эс мана, Шăпа?

Ах, аттеçĕм, эсĕ халь ăçта-ши?

Ах, аннеçĕм, ма салхуллă эс?

Сăнӳкерчĕкрен тинкерчĕ ашшĕ,

Темшĕн ывăл чĕннине илтмест.

Çĕнĕ комментари хуш