Электронлă вулавăш

Юлчĕ ман казарма хыçăмра,

Ирĕке эп тухрăм — хулана!

Тротуар выртать, ак, умăмра,

Йăл! та йăл! кулать хула мана.

Хушса юрламалли:

Эп — салтак!

Каçчен эп ирĕкре!

Кăшт, пăртак

Вĕçме хушать чĕре.

Вăл паллашма хушать мана паян

Пĕр-пĕр хĕрпе, кам çепĕç те аван.

Ак, чупать-чупать умра проспект,

Илĕртсе чĕнеççĕ кафесем.

Ешерет парк симĕс вăрман пек,

Кĕр унта — пулмасть сана кичем.

Хумханать чĕрем ман кăкăрта:

Ирĕке тухнишăн савăнать.

Хаклама пĕлет ăна салтак,

Ирĕк сывлăш вăй парать чуна.

Салтака ан чар паян, патруль!

Ирĕкри çынна ан чăрмантар.

Сун ăна паян телейлĕ çул,

Чыс туса мана эс алă пар.