Икĕ сăвă

Алексей Аттил | Сăвă | 573


1

Çур кунĕ е кĕр кунĕ? — Пурпĕрех.

Уç сывлăшăн сивви тусансăр, нӳрлĕ,

Пас çутинче инçет те инçерех,

хевеллĕ çӳл тӳпе татах та çӳллĕ.

 

Ирĕкленетĕп эп те чĕлтĕр илемпе:

Ку илемре калас-и манăн: «Чун çук?»

«Тăванлă тес-и вăл туйăмсемпе?»...

Çырлахнă эп. Хуравламан ыйту çук.

 

2

Çырлахнă эс, ман кӳршĕм, ман пекех.

Анчах уйра ыран эс тырă вырăн. —

Хам кĕтесе вырнаçăп эп. Текех

хитре сăмах тупса çĕн сăвă çырăп.

 

Вуланă чух унта эс чун шыра,

мĕн-ма тесен, сан хăвăн та пур ирĕк:

суя йĕрке çиçмест-и сăвăра?

Унта ан пултăр пурпĕрехлĕх чирĕ.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ:

Шухăшсем