«Тавах, туссем!..»

Тавах, туссем!

Эсир пурри — телейĕм.

Сире курсан ман чунăм

уçăлать.

Ăçта такăнасса мĕнле пĕлейĕн?

Юлташ туять те инкекрен çăлать.

Чи ăша камал, чи шевлеллĕ çутă —

Ман тусăмсен пехилĕ те парни.

Пĕрле чухне сулмаклăрах пек утăм,

Çулталăкнех пырать пек Çăварни.

Çапах та хытăрах хăвран ыйтатăн:

Мĕн турăм эп туссемшĕн пурнăçра?

Илтĕм нумай, хамран мĕнех-ши патăм,

Туссем мана тытаççĕ-ши асра?

Çул иртнĕçем йывăртарах çак шухăш:

Васкасчĕ çынсене телей кӳме.

Кама эп парăмлă, хăюллăн тухăр

Пĕр хĕрхенмесĕр, вирлĕн питлеме.

1996, раштав

Çĕнĕ комментари хуш