«Туслăхпа витĕнсе кĕрекен Ăмсану…»

Мальвина Петрова | Сăвă | 657


Туслăхпа витĕнсе кĕрекен Ăмсану,

Хăрамастăп санран — ирт çумма, хăна пул!

Хăнăхса çитнĕрен сан кашни хускану —

Йăпанмалăх тетте; йăлăхсан — çĕнĕ çул

Шырама хистекен, хусканмалăх сăлтав...

 

Çийĕмре — Çитĕнӳ: хыпашласшăн аллу,

Хăрамастăп унран — пул çумра, юкăс ту1;

Ăтса ил2 кирлине — ĕмĕрхи сан йăлу.

Ĕлкĕмрен3 ӳкерсе илнипех хăв, ăсту

Çĕлетсе тăхнас çук ăшăнмалăх мухтав...

 

Кĕвĕçӳ çинĕрен сӳтĕлет чăтăму...

Юлташла çавăтса кăларать Тарăху,

Леш енче кĕтекен Тавăру-тăвану

Тухсанах тыттарать ман ятпа çĕн чуху4...

Тĕл пулатпăр, эппин. Хисепленешĕн тав!

 
1 юкăс ту – тытса тĕрĕсле
2 ăт – куçарса ил
3 ĕлкĕ — тĕслĕх
4 чуху – суя, усал сăмах

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: