Электронлă вулавăш

Вырăссен «Виновата ли я» юррин сăнарĕпе кĕввине тĕпе хурса.

Каласам эс мана! Мĕн эп турăм сана?

Мĕншĕн эсĕ манран пăрăнан?

Чĕререн юратса парнелерĕм чуна.

— Мĕншĕн эсĕ куçна пытаран?

Кирлĕ мар хурлама! Кирлĕ мар ман çинчен

Ют çынсем умĕнче калаçма.

Юратсах эп сана çуллахи каçсенче

Ирĕк патăм хама чуптума!

Çĕмĕртсем айĕнче, ытарми каçсенче

Сăмах патăн мана юратма.

Кĕркунне çитейсен, авăн уйăхĕнче

Ирĕк илтĕн манран туй тума.

Çылăх çук чунăмра. Айăп çук сан умра!

Кирлĕ мар ютсене итлеме.

Эп шанатăп, паян яланхи вырăнта

Пултарайăн манпа киленме!

Куллен вăрçатпăр пурнăçа,

Айăплисем, тен, хамăрах?

Хушаççĕ: «Тăвăр ак çапла!»

Тăвасчĕ пирĕн лайăхрах.

Хăратпăр кăтартма шăрта,

Киревсĕр ĕçсем те çумрах.

Йĕретпĕр, хурланатпăр та

Шыратпăр: «Айăпĕ камра?»

Сĕтел çинче пылпа сар çу,

Вăрçатпăр: «Пурнăç каялла».

Пĕрмай вăрçнин усси те çук,

Мул хăй кĕрсе ӳкмест алла.

Айăплă эпĕ... айăплă...

Аннем умĕнче питĕ айăплă.

— Вĕренсе ăс пух

хавал çитнĕ чух, —

Турткалантăм чунтан чăхăм-кайăкла...

Айăплă эпĕ... айăплă...

Аттем умĕнче питĕ айăплă.

— Кил-çурта эс пăх,

тĕреклентĕр йăх, —

Çил çунатлăх тартрĕ çиçĕм-кайăкла...

Айăплă эпĕ... айăплă...

Ял-йыш умĕнче питĕ айăплă.

— Ĕç-хĕлпе пит шух(ă),

юл яла ку чух, —

Ирĕке эп саврăм иртĕн(нĕ) кайăкла...

Айăплă эпĕ... айăплă...

Тус-йыш умĕнче питĕ айăплă.

Çилĕ-тăвăлĕ çавăрттарнă чух

Çунат сарма çук ăмăрт кайăкла...

Айăплă эпĕ... айăплă...

Тĕнче умĕнче питĕ айăплă.

Вут(лă) хура çĕлен хĕн-хур сапнă чух

Сирме халăм çук Турă-Кайăкла...

Айăплă эпĕ... айăплă...

Вĕçĕ-хĕррисĕр

эпĕ

айăплă...